الأهالى : البلد كانت عايمة على بركة مياه
والمشروع ينقذنا من التلوث والأمراض الخطيرة
فى اطار السعى المستمر للمساهمة لتوفير حياه كريمة لأهلنا فى الصعيد..تم
توقيع بروتوكول تعاون بين “جمعية أصدقاء المبادرة القومية ضد السرطان”،
ومحافظة سوهاج وشركة مياه الشر ب والصرف الصحى ومؤسسة تروس مصر للتنمية،
لتركيب وصلات صرف صحى وتوفير مياه الشرب النظيفة لمنازل أهلنا بقرى سوهاج
وتوابعها.
ومن خلال لقاءاتنا بأهلنا فى بقرية قلفاو ونجع الخطيب بمحافظة سوهاج،
نقلوا لنا معاناتهم من عدم وجود صرف صحى، وسعادتهم بالجهود المبذولة من
الجمعية من أجل توفير وسائل حياة آدمية تحميهم من الإصابة بالأمراض،
وتقضى على أسباب التلوث، وبفضل الله وبدعمكم سيتم خلال أسبوعين الانتهاء
من تركيب وصلات الصرف الصحى بنجع الخطيب وتوصيلها بمحطة الرفع.
الحاج كامل محمد من قرية قلفاو محافظة سوهاج:
الحاج كامل، أحد سكان القرية، تسببت نزح مياه الصرف الصحى فى تدمير
حوائط منزله، وفى انتشار الرائحة الكريهة بالمنزل إلى جانب الحشرات، يقول
الحاج كامل: أنا نفسى الصرف الصحى يوصل لكل مكان لأنى أنا من الناس اللى
تعبت من وجود الطرنش فى البيت وعارف الناس قد إيه بتعانى من الأمراض
والفشل الكلوى وأمراض تانية كتير، أوقات كتير بحط طوب فى البيت علشان
نعدى عليه، وكمان تحت سرير علشان يعلى شوية من كتر طفح المياه فى البيت..
كتر خير جمعية أصدقاء المبادرة القومية ضد السرطان وكل الهمم اللى بتساعد
أنهم ينقذونا من اللى إحنا فيه.
محمود الطريفى من سكان قرية قلفاو بسوهاج:
البلد كلها عايمة على بركة ميه بسبب الطرنشات، أحنا هناكل ونأكل عيالنا
ولا هنجيب عربيات تنزح المياه، الصرف الصحى هينقذنا احنا بلدنا محتاجة
لكل إيد تساعد علشان نخلص من العذاب اللى بنشوفه.. مش عارفين نشكر جمعية
أصدقاء المبادرة القومية ضد السرطان حقيقى مفيش كلام يوصف إحساس كل واحد
فى القرية إنه أخيرا هايكون فى بيته صرف صحى، ونقضى على مستنقعات مياه
الصرف اللى بتتسبب لنا فى الأمراض لولادنا ولينا.
الحاج بدوى شيخ نجع الخطيب بمدينة أخميم بسوهاج:
أثناء الاطمئنان على الانتهاء من تركيب توصيلات الصرف الصحى بالنجع،
التقينا بالحاج بدوى شيخ نجع الخطيب، وقال: لازم تدخلوا البيوت علشان
تشوفوا المعاناة اللى احنا فيها.. عندنا بيوت كتير بالطين وفيها طرنشات،
تخيل الميه تطفح فى بيت مبنى بالطين، يعنى الناس بتنام وهى خايفة أن
البيت يقع عليهم فى يوم من الأيام، ده غير الأمراض والحشرات ومشاكل كتير.
ومن الجدير بالذكر أن العمل يجرى على قدم وساق بالتعاون مع شركة مياه
الشر ب والصرف الصحى للانتهاء من تركيب الوصلات بأسرع وقت، للحفاظ على
صحة أهلنا فى الصعيد، وقد التقينا بالمهندس أبو ضيف محمد، رئيس قطاع
المشروعات بشركة مياه الشرب والصرف الصحى بسوهاج، وقال شكرا للجمعية على
اهتمامها بقرى محافظة سوهاج، مشروع توصيل الصرف اللى الجمعية بتعمله
دلوقتى هايحمى أجيال كتير من خطورة الطرنشات، لأنها تسبب تلوث كبير
وأمراض خطيرة بسبب دخول الحشرات وطفح المياه فى البيوت والشوارع.
دعمكم ساعدنا نوصل الصرف الصحى لنجع الخطيب بمدينة أخميم محافظة سوهاج،
وسيتم الانتهاء منه خلال أسبوعين إن شاء الله.. والعمل يجرى على قدم وساق
للانتهاء من وصلات قرية قلفاو.
وتعد هذه الجهود مبادرة نموذجية، تعكس قوة العلاقة بين الأجهزة الحكومية
والمجتمع المدنى.. وتعمق فكرة مشاركة المجتمع المدنى فى مشروعات
التنمية.. والتى لا تستطيع أى حكومة فى العالم أن تقوم بها بمفردها.
دعمك هايساعدنا نكمل مشوار الخير وتوفير حياة آدمية لأهلنا فى القرى الأشد احتياجا.
اتبرع على حساب 66 66 66 فى جميع البنوك المصرية، وساهم فى انقاذ القرى
الأشد فقراً، واحم أهلنا فى الصعيد وأطفال مصر من الأمراض
جمعية أصدقاء المبادرة القومية ضد السرطان.. الإنسانية ضد سرطان الجهل..
سرطان المرض.. سرطان الفقر